Press Statement:
Reference Person:Leah Valencia, Secretary General-Kadamay NCR I 09219748372
Solusyon ni PNoy sa problema sa baha, pagpapasabog sa maralita.
Hindi nakitaan ng kaunting malasakit sa maralita si Pangulong Noynoy Aquino simula ng siya ay malulok sa pwesto kahit pa pakunwari niyang sinasabi na tayo ang “Boss” niya. Agarang sinisi ng Malakanyang na ang maysala sa matinding pagbaha ng Metro Manila ay ang mga maralitang-lunsod dahil sila ang mga nakatira sa mga estero, kanal at mga tabing dagat. Sila rin ang pinagbibintangang nagtatapon ng trak-trak na basurang inanod ng baha sa Manila Bay.
Ang mas matindi pa, sa miting ng NDRRMC (National Disaster Risk Reduction and Management Council) sa Malakanyang noong nakaraang Lunes ay tinukoy ng Malakanyang na ang malaking pinanggagalingan ng malawakang pagbaha ay ang mga maralitang-lunsod. Ayon kay Sec. Singson ng DPWH, “Kung nais natin na bigyang solusyon ang malawakang pagbaha, kailangan natin ng malalim na political will. Kung hindi aalis ang mga maralita sa kanilang mga tinitirikang bahay, pasasabugin namin ang kanilang mga kabahayan.”
Dapat kondenahin ng mamamayan ang pahayag na ito ng Malakanyang at ni Sec. Singson. Kalakhan sa mga naapektuhan at biktima ng matinding pagbaha ay mga maralitang nawasak ang kabuhayan at paninirahan. Sa datos ng Kadamay-NCR, aabot ng mahigit sa 200,000 pamilya ang naapektuhang maralita sa kalakhang Maynila pa lamang. Maliit na bahagi ito sa tinatayang 2 milyong pamilyang apektado sa 4 na rehiyon sa Luzon. Tayo na nga ang biktima at nangangailangan ngunit tayo pa rin ang patuloy na sinisisi ng rehimeng ito.
Isang sanhi ng pagdami ng basura sa Manila Bay ay ang pagpapahintulot ng Department of Environment and Natural Resources sa pagtatayo ng Obando, Bulacan Landfill kung saan ay nasa baybay dagat lamang ng Manila Bay na sa panahon ng tag-ulan ay hindi maiiwasang anurin ang basura at mapunta sa mga karatig nitong lugar. Hindimga maralitang-lunsod ang nagtatapon ng basura sa mga estero at sa Manila Bay, sa katunayan ang karamihan sa mga maralita ngayon ay nabubuhay na lamang sa pangangalakal, pamumulasi o pamumulot ng basura upang mapagkakitaan at bumuhay sa kanilang mga pamilya. Walang kapasidad ang mga maralitang bilhin ang mga plastik-plastik na produktong makikita sa mga basurahan dahil sa kaliitan ng kanilang kita.
Ang pagtatayo mismo ng mga floodway na gaya ng Manggahan, Napindan at Tripa De Galena floodway ang isang dahilan kung bakit lalong lumalala ang pagbaha sa Kalakhang Maynila. Pinipigilan nitong lumabas ang natural na daloy ng tubig mula sa Lawa ng Laguna dahil ayaw nilang magtuloy-tuloy ang tubig baha sa Ilog Pasig sa takot na bahain ang mismong Malakanyang.
Idagdag pa sa pagkakalabas ng Exec. Order #79 o ang Mining E.O, lalo lamang nitong pinatitindi ang pagsasamantala ng mga malalaking kompanya ng pagmimina para wasakin ang mga kabundukan at kagubatan sa paggamit ng “open pit mining”. Ito ang dahilan sa mabilis na pagragasa ng tubig baha mula sa mga kalbong kabundukan at naiipon ang tubig sa mga malalaking DAM na walang habas na nagpapakawala ng kanilang tubig kapag nasa kritikal na antas na.
Sa inilabas na pahayag ng Inquirer noong bagyong Gener, sinabi dito na ang isang mayor na dahilan ng pagbaha sa Marikina ay ang pagkakaroon ng mga malalaking istruktura na naitayo sa mga natural na daanang-tubig gaya ng Marikina River. Noong hindi pa naitatayo dito ang SM at Provident Village, hindi nakakaranas ng matinding pagbaha ang Marikina. Pinapalayas ang mga maralita sa mga tinatawag nilang “Danger Area” ngunit matapos silang palayasin ay tinatayuan naman ng mga naglalakihang imprastraktura o negosyo gaya na lamang ng dabu-dabu island na ngayon ay kinatatayuan ng SM Mall of Asia.
Malinaw sa pahayag na ito ng Malakanyang na gusto lamang niyang siguraduhin ang mabilisang pagpapatupad ng kanyang mga proyekto sa ngalan ng PPP (Public Private Partnership) tulad ng Manila Bay Reclamation Project na nasa ilalim ng National Reclamation Project. Isa sa mga rekisitos upang maipatupad ang naturang reklamasyon ay ang paglilinis ng mga waterways o estero kaya naman ganun na lamang ang kanyang pagmamadali na idemolis ang kabahayan ng mga maralita. Sa pagpapatupad nito lalo nitong palulubugin ang Metro Manila dahil sa pagbabara ng natural na daluyang-tubig at wawasak sa mga malalaking ilog gaya ng Pampanga River, Pasig River, Paranaque River, Las Pinas at Bacoor. Sinisira at sisirain nito ang natural na balanse ng ating ekosistema sa ngalan ng pakinabang ng kanyang mga mas pinapaborang malalaking negosyante gaya nina Lucio Tan, Henry Sy, Ayala, DMCI, Danding Cojuangco at iba pa, pinapayagan ni PNoy na tuluyang lunurin at patayin sa baha ang mga maralita.
Hindi umaayaw ang mga maralita na iwanan ang mga danger zone na kinatitirikan ng kanilang mga kabahayan, ang inaayawan ng mga maralita ay ang alisin sila sa kanilang mga kabuhayan at ilipat sa mga relocation site na unti-unting papatay sa kanila gaya ng naganap sa Kasiglahan Village, Southville 1 at Northville nito lamang panahon ng habagat.
Pilit niyang pinagtatakpan at inililihis ang mas malaking kasalanan niya sa mamamayan sa patuloy na pagpapabaya sa kanyang tungkulin bilang pangulo. Nalantad ang kawalang kahandaan at kakayahan nito sa mga ganitong klase ng kalamidad. Kahiya-hiya, palpak at anti-maralita ang isang pamahalaan na hindi man lamang kayang protektahan ang kanyang mamamayan sa panahon ng sakuna, sa halip na kalingain sila sa panahon ng paghihirap at sakuna ay patuloy pang isinisisi.
Ang patuloy na pagpapanatili sa sadlak na kalagayan ng maralita ang patunay ng kanyang kriminal na kapabayaan at pag-abandona ng pamahalaan sa kanyang mamamayan. Sa pagpapanatili nito ay patuloy na naiipon ang galit ng mamamayan. Ang kinikimkim na galit ng mamamayan sa mahabang panahong pagtitiis sa kahirapan at kaapihan ay tiyak na magmimistulang bulkang sasabog anumang oras. Ang pagsabog na iyan ang dapat katakutan ng rehimeng ito. ###
BARIKADANG BAYAN 